Oonakulwa vakulu va pula oshikondo shouyuki shi tye sha kombinga yoshipofa shavo noSwapo

Ongudu yoonakulwa vakulu voSwapo ve li koshi yehangano ledina Former Refugees Repatriation Association of Namibia oya shangela minista wouyuki noipambele yoilonga omukanda Omaandaxa, tai nyenyeta kombinga yomakateko vati e oshipofa shayo osho shi li mOmhangu yOpombada tashi pula Swapo e va fute eemiliona oN$25.

Omukanda, wa yandjwa komunashipundi wongudu, Matheus Nangolo, okwa li wa tambulwa ko komukulunhuwiliki woministeli, Audrin Mathe.

She likolelela komukanda, oshikumungu eshi inashi ungaungwa na sho oule weemwedi mbali paife, okudja momafiku 06 Juni fiyo o6 Auguste.

Ovashangi otava ti kutya ova kala va teelela va pewe efiku loihokolola ashike kapu na eshi sha ningwa po.

“Otwa dopa okuuda ko kutya omolwashike oshikumungu eshi inashi ungaungwa nasho oule weemwedi mbali nghee sha yandjelwe nokudiminwa,” Nangolo ta ti.

Ongudu otai ti ekateko eli ole va handukifa neenghono, ole va ngwangwaneka nove li va limbililwa paife.

Ovakondjeli manguluko ova yeleka kutya omanyenyeto avo inaa yukifwa nande okomupanguli ile komunambelewa woshikondo shomatokolo wonhumba, tava tambula ko kutya ove shii kutya oshikondo shokuninga omatokolo oshi na oilonga ihapu.

Ongudu ei oya kala ya xunga onanda pombelewa yakula yoSwapo mOvenduka okudja ngaa muOktoba 2025, tai pula i futwe eemiliona di li N$21.6 odo vati da yandjwa kOiwana yaHangana di va yambidide eshi va dja kombada momudo 1989.

Ova dama kutya itava di po ponhele opo fiyo va mona omukanda wopambelewa tau ndjadjukununa kutya oinamaliwa oyo oya longa shike.

Ovakondjeli manguluko ova indila oministeli i tule moilonga omilandu da nuka po i kwashilipaleke kutya oipofa yomhangu oya ungwaungwa nayo pefimbo, tava londwele kutya omakateko taa twikile otaa teya po elineekelo loshiwana moshikondo shomatokolo nomomahangano efinamhango.

Eshi a tambula ko omukanda, Mathe okwa tambula ko omanyenyeto ovakondjeli manguluko ndee ta ti oministeli otai nyamukula omukanda ou okupitila momilandu dopaveta domondjila.

The post Oonakulwa vakulu va pula oshikondo shouyuki shi tye sha kombinga yoshipofa shavo noSwapo appeared first on The Namibian.