Haufiku a pula Noa apa a xulila noshipofa shoulingilingi mOministeli yOundjolowele

Minista mukulu woundjolowele Bernard Haufiku okwa pula ngee omukulunhuwiliki a fiya po Okomisi yOkulwifa Oulingilingi Paulus Noa okwa amena omunhu oo ta popilwa oulingilingi kOministeli yOundjolowele.

Edi Haufiku okwe di popya Etitano momapulaapulo noThe Namibian eshi kwa li ta nyamukula komapopyo aNoa taa ti okomisi otai ungaunga noipofa youlingilingi.

“Epulo oleli: Omukulunhuwiliki oo ta fiye po okomisi okwa mwenena oshipofa shange shaashi umwe womovanhu ovo va kwatelwa moulingilingi kOministeli yOundjolowele, omulumenhu, omonamati wakaume kaye?” Haufiku ta pula.

Minista woundjolowele mukulu ina tumbula nande omadina ovanhu ava.

Ashike nande ongaho okwa ti oshikumungu eshi osha ninga omido tadi hange pomulongo paife ndee ta pula ngee Noa okwa dopa okukatuka onghatu shaashi umwe womwaavo va kwatelwa moshinima omu oku na ekwatafano naye.

Haufiku okwa ti okwa yandja osho ta ifana oumbangi wekengelelo lokukonga oipumbiwa mOministeli yOundjolowele pokati komudo 2016 no2017, mwa kwatelwa omukanda womapandja e li o51, ashike okwa ti ombelewa yaNoa kai na eshi ya ninga po.

“Fiyo opaife kapu na eshi sha ningwa po kombelewa yomukulunhuwiliki. Konima yomido omulongo.

Ndele oshiwana natango osha teelela okuuda komukulunhuwiliki oo ta fiye po ombelewa,” Haufiku ta ti.
“Na nyamukule epulo eli.”

Omapopyo aa ee ya eshi Noa ta popile ondjokonona yOkomisi yOkulwifa Oulingilingi, ta ti okomisi itai dulu ashike okulandula ovanhu shaashi oshiwana sha hala va mangwa po.

“Ngee okomisi itai landula omunhu wonhumba oo tashi dulika a talika ko kutya ita shikula oveta, osheshi ashike puhe na oumbangi oo u na okulongifwa kokomisi i katukile omunhu ou onghatu,” Noa osho a ti ngaho.

Okwa ti omakonakono naa mone ngee oshikumungu otashi dulu okutuminwa kombelewa yokutamaneka opo kungingwe etokolo ngee naku patululwe oshipofa.

Eshi a nyamukula komapopyo aHaufiku Oshoondaxa, Noa okwa ti omakonakono kombinga youlingilingi mOministeli yOundjolowele nOmayakulo Opanghalafano natango ee li metifa. Okwa ti inaa mena omunhu.

“Haufiku oku shii nge nawa, oku shii kutya ota kwatafana naame ngahelipi….okwa li e na oku shi pula nge ngee oku wete pu na sha tashi limbililike tashi holekwa. Oshike ina pulila nge?,” Noa ta ti.

Noa okwa ti okwa lombwela omukulunhuwiliki mupe Bryan Eiseb kombinga yomakonakono Oministeli yOundjolowele manga ina ya shaashi aamwe omoipofa yakula inai manifwa.

Ashike nande ongaho, Haufiku okwa ti enyenyeto laye inali talika ko ashike la fa omafininiko oshiwana.

“Eshi oshipofa sha kula shi na oumbangi woinima ya puka wa yandjwa,” osho a ti ngaho.

“Ndee ngee omukulunhuwiliki oo ta fiye po ombelewa ina mona omukanda womapandja o51 oo nda yandja momudo 2017 kombelewa yaye, ohandi mu tumine okopi ile ndi i pe omulanduli waye,” osho a ti ngaho.

“Eshi oshipofa sha kula shi na oumbangi woinima ya puka wa yandjwa.

Nonghee nee osha pumbwa okutalwa nawa komunhu ou e na oshinakuwanifa nokokomisi yoshiwana oyo ya tulwa po i kwashilipaleke kutya omilandu, eesystema, omahangano nakeshe ou a kwatelwa mo ota longo ngaashi shi na okukala.

Puhe na oumbada ile okwaamena omunhu,” Haufiku ta ti.

Odula ya dja ko Haufiku okwa lombwela oThe Namibian kutya oikwanoipangifo yopaunamiti oyo ya landifwa kepangelo pefimbo laye okwa li ya ningwa ondilo neepelesenda o300, osho sha tukulufa omalimbililo kombinga youlingilingi noinima ihe li mondjila momulandu weetendela doministeli.

Omundjadjukununi woikwapolitika Ndumba Kamwanyah okwa ti oshiwana nashi kale shi shii kutya Okomisi yOkulwifa Oulingilingi itai dulu okukonakona keshe omafeekelo shaashi ashike oshiwana otashi fininike.

“Omakonakono naa kale e likolelela kouyelele u shii okulineekelwa noumbangi. Ashike nee, eshi itashi ti okomisi nai ekeleshi omalimbililo oshiwana,” Kamwanyah ta ti.

The post Haufiku a pula Noa apa a xulila noshipofa shoulingilingi mOministeli yOundjolowele appeared first on The Namibian.