Ndaitwah a pula efikopamwe loukashikekokanhu laaveshe

Epapharas Denga Ndaitwah okwa indila kuningwe omulandu wa kwatela mo ovanhu aveshe ngee tashi ya kefikopamwe loukashikekokanhu, ta ti kutya enghonopeko lovakainhu noukadona nonghalonawa yokaana kokamati oinima i fike pamwe.

Eshi kwa li ta popi pouvalelo wowina wokwoongela oshimaliwa wehangano ledina African First Ladies for Development (OAFLD) moAngola Etitano, okwa ti ovalumenhu novakainhu aveshe ove fike pamwe noku va nghonopeka aveshe okwa fimana opo kuhangwe eyambukepo laalushe.

“Osha fimana opo tu longe noudiinini tu kwashilipaleke kutya ovamati novalumenhu ovanyasha navo ova tuwa omukumo va kale meefikola, va kale kokule nokuninga oimbuluma nokulongifa oingangamwifi, ndee tave litula mokuhanga eendjodi davo mehongo,” osho a ti ngaho.

She likolelela kuye, ouyelele wopaunyuni otau holola nghee ehongo lovamati li li moshiponga, oundjolowele wopamadilaadilo neyokomesho lopanghalafanao.

Okwa ti ombelewa yaye otai ka ungaunga nomikundu edi opo kuhangwe efikopamwe loukashikekokanhu nokuxwaxwameka ekufombinga laalushe lovalumenhu novakainhu moshiwana.

Ta endulula olopota yoUnesco, Ndaitwaha okwa ti ounona voumati ve li eemiliona 132 ova dja mo meefikola mounyuni navahapu ohava endulula eendodo dopetameko okuyelakanifa noukadona, omanga vashona ovo ashike hava i fiyo okeendodo dopombada.

“Oshiwana shounona voumati va tekulilwa efimaneko, eyambidido nokukala ve fike pamwe novakainhu noukadona otashi nghonopeke eyokomesho laAfrica,” osho a ti ngaho.

Ndaitwah natango okwa ninga eindilo opo ehangano eli li lukululwe li ninge African First Spouses and Development (OAFSAD) li dule okukwatela mo ovanhu aveshe.

The post Ndaitwah a pula efikopamwe loukashikekokanhu laaveshe appeared first on The Namibian.