Ovanailonga vepangelo otava mono oixuna keengunga
Eendjabi dishona, ovayandji veengunga tava heke ovanhu nomwaka moveta oyo oinima imwe yomwaayo tai nanene ovanailonga vepangelo meengunga, okakomitiye kopaliamente osho ka uda osho. Nande ovayandji veengunga itava dulu naana okukana shaashi ohava nane keendjabi dovaindili payukililo, luhapu di fike ashike ashike nokuli poN$3 000, natango ohava weda ko oishoshela ya pitilila. Oshinima eshi oshe […] The post Ovanailonga vepangelo otava mono oixuna keengunga appeared first on The Namibian.
Black News 
Eendjabi dishona, ovayandji veengunga tava heke ovanhu nomwaka moveta oyo oinima imwe yomwaayo tai nanene ovanailonga vepangelo meengunga, okakomitiye kopaliamente osho ka uda osho.
Nande ovayandji veengunga itava dulu naana okukana shaashi ohava nane keendjabi dovaindili payukililo, luhapu di fike ashike ashike nokuli poN$3 000, natango ohava weda ko oishoshela ya pitilila.
Oshinima eshi oshe ya eshi okakomitiye kopaliamente koipambele yopaliko, oko kwa li ka ninga omutumba Etitano la dja ko, taka konakona opo eeveta odo di li moilonga tadi amene nawa Ovanamibia vaha hepekwe komahangano okuyandja eengunga novayandji veengunga inava shangifwa.
Omunashipundi wokakomitiye Iipumbu Shiimi Omaandaxa okwa ti okakomitiye otaka talulula nghee omikalo dokuyandja eengunga tadi hepe oshiwana, unene ngaa ovanailonga vepangelo.
“Okakomitiye ketu natango oke li metifa taka kundafana novakufimbinga va yooloka ka mone omikalo domondjila dokuungaunga neengunga domomaumbo di li pombada, unene ngaa mokati kovanailonga vepangelo.
Ashike nande ongaho, otwa didilika oyeetifi imwe oyo ya fa tai eta eengunga davo dihapu,” osho a ti ngaho.
Shiimi okwa ti ovanailonga vepangelo vahapu ohava shaala po ashike noumaliwa vashona molwodumba yeengunga odo ve na okufuta.
Eshi otashi ningwa nande oveta yoilonga oya yeleka nawa oshipambu osho tashi dulu okunanwa kondjabi yomunailonga meyukililo, osho a ti ngaho.
Omunashipundi okwa ti oshikondo shokufuta eendjabi, osho sha pitika eengunga di nanwe keendjabi dovanailonga vepangelo payukililo, osha fa osho tashi eta eengunga di li pombada.
“Onda itavela kutya ngee oinima ei ya ungaungwa nayo, ohatu i kokule nokuvatela omaumbo, unene ngaa ovanailonga vepangelo, opo va ungaunge nawa noikumungu yavo yopashimaliwa,” Shiimi ta ti.
Okakomitiye otaka ka kundafana vali kombinga yoshikumungu eshi mopaliamente mEtitano.
Epangelo ola itavela kutya ondjabi yoshimaliwa shi fike poN$3 000 komwedi oishona neenghono, notai fininikile ovanailonga vepangelo meengunga.
Omukulunhuwiliki ta vatele mOmbelewa yOmuprima minista Shivute Indongo eshi okwe shi popya Etitano, ta weda po kutya onghalo natango osho i li ngaha nande ovanailonga vamwe ova pewa ewedelo leepelesenda nhano mafiku aa.
Indongo okwa ti kutya ovanailonga vahapu vepangelo ohava shaala po noiyemo ishona neenghono konima va nanwa eengunga.
Indongo okwa yandja oushima komulandu weendjabi depangelo, unene ngaa ondodo yaxuuninwa.
“Oshikumungu sheendjabi dishona oshi shiivike nawa. Ondodo o-15 no18 okwa li ya pumbwa okukufwa po. Omunhu ina kala ta mono ondjabi i fike poN$3 000 mepangelo,” osho a ti ngaho.
Indongo okwa ti eendjabi di li ngaho inadi wana ngee tadi yelakanifwa nomilandu doilonga moikondo ikwao, mwa kwatelwa oilonga yomomaumbo, meefaalama noilonga ikwao ya nafangwa.
“Kandi shii kutya omolwashike sha pitikwa. Omunhu oto etele ovanailonga ovo ve li mondodo yaxuuninwa yeendjabi onghenda ndee to lipula kutya ohava xupu ngahelipi,” osho a ti ngaho.
Okwa ti ovanailonga vahapu ohava indile oimaliwa yokulya ponhele yokuninga eengeshefa. Shaashi vahapu kave na oiyemo oyo tai dulu oku va pefa omikuli keembaanga, ohava i nee komahangano okuyandja omikuli ile kovanhu ovo hava yandje omikuli inadi nyolifwa va ka konge omikuli.
Oilanduli kai li nawa nandenande, osho a ti ngaho.
Hamushangandjai wehangano loNational Union of Namibian Workers Job Muniaro okwa yandja oushima kepangelo eshi la dopa okulundulula omulandu weendjabi dovanailonga, unene ngaa ovo ve li mondodo yaxuuninwa yeendjabi.
Okwa ti kutya okuyandja omukuli kaku shii oupyakadi, ashike okunana kuhe li pauyuki oupyakadi wakula.
“Ito dulu okunana eepelesenda o-60 kondjabi yomunhu. Manga epangelo inali yandja oilonga, nali konakone kutya ovanailonga ngaashi ovawapaleki ova pumbwa shike opo va dule okuxupa,” osho a ti ngaho.
Muniaro okwa ti ovanailonga ovo hava mono eendjabi dishona, mwa kwatelwa ovapolifi, ovawapaleki novashingi, nava mone ngeno ondjabi i fike poN$16 000 komwedi opo va dule okulanda omaumbo nokuwanifa po eemumbwe davo dakeshe efiku.
Okwa ti ovanailonga vahapu ohava mono oixuna keenhele davo doilonga, omanga ve li mondomwi yoluhepo.
The post Ovanailonga vepangelo otava mono oixuna keengunga appeared first on The Namibian.
