“Ngeno kwa li ko, ngeno ino shi mona”…Okongo opo tai kala

OKONGO- Mexuliloshivike elelo lodoolopa yaKongo okwa li la unganeka efiku leetuwa tadi ningi omafiyafano okushingwa mefululu ponhele oyo ya totwa po yovatalelipo. 

Eetuwa ashike do 4×4 kwa li tadi shingwa mefululu molwaashi odi na eenghono nomalola a kula. 

Ovanhu omayovi okwa li va holoka okutala eshi eetuwa domaludi a yooloka tadi shingwa mefululu.  Oshiwana sha dja momudingonoko waKongo osho yo koitukulwa ya yooloka okwa li nasho sha holoka momwaalu muhapu okutala eshi omatuwa taa fukula efululu.  

Jona Mupembe ou e li ta longele koshikondo shokuxwaxwameka oipindi mOkongo okwa ti eshi oshi li oshikando shotete monooli hano moshitukulwa shaHangwena oku tota po onhele yovatalelipo tai kala tai shingwa eetuwa. 

“Onhele ei oya fimana molwaashi otai nane ovatalelipo tava di kondje yoshilongo osho yo meni loshilongo okukala tave uya mOkongo okushinga eetuwa davo mefululu,” ta ti. 

Okwa ti elalakano okuyambula po odoolopa yaKongo nokukala i shiivike nawa kutya mboli Okongo oya xuma komesho. 

Okwa hokolola ta ti efiku lokushinga eetuwa mefululu ola enda nawa noshiwana okwa li sha holoka okutala eshi eeetuwa ta di shingwa mefululu. 

“Omatuwa okwa li taa shingwa moshili e li mokati kefululu. Oshiwana okwa li sha hafa tashi faneke eshi omatuwa taa shingwa,” ta ti.  Okwa ti ngeenge owa i komalungula oto hange ko ashike ouvidio va tulwa ko koikundaneki eshi eetuwa tadi shingwa mefululu. 

Mupembe okwa ti omunhu o u ina fika efiku olo okwa pitililwa po molwaashi efiku okwa li liwa noli na ondjokonona iwa mOkongo. 

“Ngeno kwa li ko ngeno ino shi mona. Okongo opo tai kala notai xumu komesho nokueta po omayakulo popepi noshiwana,” ta ti. 

Omahangano a yooloka aa landifa eetuwa nao okwa li a holoka kefiku lokushinga eetuwa mefululu nelalakano lokuyambidida odoolopa. 

-fhamalwa@nepc.com.na  

The post “Ngeno kwa li ko, ngeno ino shi mona”…Okongo opo tai kala appeared first on New Era.