Oministili yomaudano kai na eshiivo kombinga yomukuli weemiliyona N$500 woRCC
Oministili yehongo, omaduto oinima ipe, ovanyasha, omaudano, omaunghulungu nomifyuululwakalo oya ti kai na eshiivo kombinga yetokolo lehangano ledina Road Contractor Company (RCC) lokupula omukuli weemiliyona da wedwa po di li N$500 dokutunga oupale vomaudano oshilongo ashishe. Omukulunhuwiliki womaudano, ovanyasha nomayakulo ovanyasha, Gerard Vries okwa ti oministili inai ulika o-RCC i kalele po epangelo mokukonga oimaliwa […] The post Oministili yomaudano kai na eshiivo kombinga yomukuli weemiliyona N$500 woRCC appeared first on The Namibian.
Black News 
Oministili yehongo, omaduto oinima ipe, ovanyasha, omaudano, omaunghulungu nomifyuululwakalo oya ti kai na eshiivo kombinga yetokolo lehangano ledina Road Contractor Company (RCC) lokupula omukuli weemiliyona da wedwa po di li N$500 dokutunga oupale vomaudano oshilongo ashishe.
Omukulunhuwiliki womaudano, ovanyasha nomayakulo ovanyasha, Gerard Vries okwa ti oministili inai ulika o-RCC i kalele po epangelo mokukonga oimaliwa kombaanga yomayambulepo yoshilongo.
Okwa ti oshimaliwa osho sha yandjwa kepangelo shi fike peemiliyona N$5 keshe mokapale oshi li pamwe nondodo yotete yopoloyeka youpale noshi li ombinga yakula, yaalushe yomafaneko omayambulepo omatungo opashiwana.
“Oministili oya hala okupopya kutya inai ulika, inai pa eengheno, ile ya ya meudafano noRCC i kalele po epangelo mokukonga oshimaliwa shokutunga oupale vomaudano,” osho a ti ngaho.
Eshi oshe ya konima oThe Namibian onghela ya lopota kutya omukulunhuwiliki ta vatele woRCC, Dasius Nelumbu, momafiku 30 Maalisa okwa tumina omukanda komukulunhuwiliki wombaanga yomayambulepo, Titus Ndove, ta pula omukuli.
She likolelela komukanda, oo wa monika koThe Namibian, Nelumbu okwa ti eemiliyona da wedwa po di li N$500 otadi ka pitika ehangano li yandje oupale vopashiwana vopamufika ve na ongushu.
“Oministili natango oyo i kwetele komesho eyambulepo lomatungo omaudano moNamibia noi na okutwikila okutula moilonga opolohalama yayo yopashiwana pamukalo wa longekidwa notau kalele po oinima opo i kwashilipaleke kutya oikandjohoololo aishe moshilongo oi na oupale vomaudano,” Vries osho a lombwela oThe Namibian ngaho Etivali.
Okwa ti eyandjo leemiliyona N$5 keshe koshikandjohoololo ola talwa nawa kepangelo opo ku tamekwe oupale vomaudano moitopolwahoololo aishe.
“Ondodo yotete oya futwa noshimaliwa sha dja momutengenekwafaneko womudo woshimaliwa 2025/26.
Epangelo ola kufa omukalo wetulomoilonga lopaendodo omo oshimaliwa sha wedwa po otashi ka yandjwa konima koshi yomutengenekwafaneko wopaife naado tadi shikula ko.
“Eshi otashi kwashilipaleke eyokomesho lomayambulepo nomawapaleko oupale momukalo u li nawa waalushe,” osho a ti ngaho.
Vries okwa ti omatungo aeshe omaudano e li koshi yeepolohalama depangelo aa tulwa moilonga palongelokumwe nomulandu wa diminwa, omilandu domafaneko nomutengenekwafaneko u li koshi yewiliko loministili.
“Onghee nee osha puka okutya eemiliyona N$5 inadi wana, shaashi oda nuninwa ashike ondodo yotete nodi li ombinga yakula yomafaneko omayambulepo omatungo opashiwana.
“Oministili oya nukila pomutenya kutya kapu na nande noi na pa fanekwa eudafano noRCC kombinga yeepoloyeka domayambulepo omatungo.
Onghee nee, oministili inai dimina, koleka ile ya yandja omalombwelo kombinga yoshimaliwa osho sha lopotwa tashi pulwa,” osho a ti ngaho.
The post Oministili yomaudano kai na eshiivo kombinga yomukuli weemiliyona N$500 woRCC appeared first on The Namibian.
