Epangelo la kaleka omayambidido omaudano

Omalutu omaudano moshilongo aa yandja oushima ketokolo lepangelo lokukaleka omayambidido aeshe opashimaliwa eengudu nomahangano omaudano, taa ti “eshuno monima loovene”.

Ovakufimbinga ova ti etokolo eli otali piyaaneke eyambukepo lovadanauki, ekufombinga neemhito doilonga moshilongo ashishe.

Oshinima eshi oshe ya konima Oministeli yEhongo, Omaduto, Ovanyasha, Omaudano, Omaunghulungu nOmifyuululwakalo ya kaleka omaindilo aeshe oshimaliwa omalutu nomahangano omaudano, tai ti kapu na oshimaliwa.

Eshi osha popiwa momukanda wa shangwa momafiku 15 Juni wa dja komukulunhuwiliki Gerard Vries, oo wa lombwela Okomisi yOmaudano yaNamibia i shiivifile omalutu aeshe omaudano kombinga yetokolo eli meendelelo ngaashi tashi dulika.

Presidente Netumbo Nandi-Ndaitwah okwa popya kutya omaudano ee li momusholondodo waye woinima ya fimana.

MuApiilili, oministeli okwa li ya tula po eemiliona N$13.5 domayambulepo eepolohalama domaudano, mwa kwatelwa eemiliona N$5 dekufombinga laaveshe meepolohalama domaudano, eemiliona N$3 lekufombinga meepolohalama domaudano moitopolwahoololo, neemiliona N$2 dOmapapa Omaudano Okomudo aNamibia, omiliona imwe yoikwanoipangifo yomaudano neemiliona N$2.5 doilonga ya pamba omaudano.

Oministeli oya shiivifa kutya oshimaliwa okwa li sha longekidilwa omalutu omaudano, mwa kwatelwa Namibia Rugby Union, Namibia Hockey Union, Namibian Schools Sport Union, Namibia National Paralympic Committe noNamibia National Olympic Committee.

Hamushangandjai woNetball Namibia, Jessica Gaomuses, Omaandaxa okwa ti olutuwiliki ola “kumwa neenghono” kekaleko lomayambidido opashimaliwa.

Gaomuses okwa ti okwe lineekela kutya “eshuno monima” eli olo pakafimbo.

Okwa ti ehangano lavo inali konakona natango kutya oshinima eshi otashi ka kuma eepolohalama davo ngahelipi, “ashike nee, pakutala kutya osha kwatakanifwa ngahelipi neyambukepo loudano otashi ka nghundipaleka neenghono onghalo youdano.”

Omuunganeki mukulu wokatanga kokeemhadi kErongo Gibson Gobes okwa ti omaudano natango ihaa pewa omayambidido a wana oshimaliwa moshilongo ndee keshe ngaa eshunifo pedu loshimaliwa okudja kepangelo otali naipaleke ashike onghalo yomaudano.

Gobes okwa ti oshinima shimwe eshi hashi etifa omaudano a kale inaa pewa oimaliwa ya wana osheshi kutya omalutu amwe omaudano, unene ngaa okatanga kokeemhadi, luhapu ihaa yandje omitengenekwafaneko dao kepangelo medina lomilandu dopaunyuni.

“Oshihopaenenwa, ngee Fifa oku na omilandu di na sha nekufombinga lepangelo metanga lokeemhadi, oshinima osho otashi dulu nale okukuma nghee oshimaliwa shi na okuyandjwa,” osho a ti ngaho.

Gobes okwa ti omaudano inaa talika ko ashike a fa okulihafifa, ashike naa talike yo kutya eemhito doilonga, unene ngaa dovanyasha.

“Hakeshe umwe ta mono oilonga yomombelewa.

Ovanhu vahapu ohava mono oiyemo okudja momaudano, ndee epangelo nali dimbuluke oshinima osho ngee tali ningi omatokolo okuyandja oimaliwa,” osho a ti ngaho.

The post Epangelo la kaleka omayambidido omaudano appeared first on The Namibian.