Nasan ota pula a futwe tete opo a yandje omahooli
Ehangano ledina Nasan Energies otali ka pula oitaashi yomahooli i li 52 oyo la landa koVivo Energy i kale tai yandje oshimaliwa tete opo nawa i mone omahooli. Oshinima eshi osha eta omafeekelo kutya ehangano kali na oimaliwa li dule okuya komesho noilonga ngaashi shito. Edi oda popiwa koitaashi imwe yomoitaashi i li 52 oyo […] The post Nasan ota pula a futwe tete opo a yandje omahooli appeared first on The Namibian.
Black News 
Ehangano ledina Nasan Energies otali ka pula oitaashi yomahooli i li 52 oyo la landa koVivo Energy i kale tai yandje oshimaliwa tete opo nawa i mone omahooli.
Oshinima eshi osha eta omafeekelo kutya ehangano kali na oimaliwa li dule okuya komesho noilonga ngaashi shito.
Edi oda popiwa koitaashi imwe yomoitaashi i li 52 oyo ya popya noThe Namibian.
Okulandifa po oitaashi imwe yoVivo koNasan okwa li kwa manifwa Etitatu la dja ko.
She likolelela komukanda wa dja koVivo wa yuka kovalandifi vomahooli ovo va kumwa koshinima eshi momafiku 21 Mei 2026, Nasan otaku fa po oshinakuwanifa shoitaashi yomahooli, mwa kwatelwa nokulandifa omahooli.
“Okudja momafiku 27 Mei 2026, Vivo Energy naEngen itava ka yandja vali omahooli keenhele odo da landwa po.
Oipambele yongeshefa aishe otai ka ningwa koNasan payukililo,” Vivo osho a ti ngaho momukanda.
Eshi ovalandifi vomahooli va dengela Nasan Energies va mbeshitele omahooli, okwa li va lombwelwa kutya ove na okufuta tete.
“Ove tu lombwela kutya kave na oimaliwa va dule okuyandja omahooli kovalandifi.
Otu na okukufa oimaliwa yetu vene, hatu futu omahooli koNasan ndee Nasan ta lande omahooli.
Ova longifa oimaliwa yavo va lande oitaashi, ashike kave na oshimaliwa shoilonga,” omulandifi umwe osho a ti ngaho.
Ovalandifi vomahooli shito ohava futu konima va mona omahooli avo.
Nande okwa li va lombwelwa kutya oilonga otai twikile koshi yeudafano nomulandu oo u li pokati kavo noVivo, eekondalaka odo da dja koNasan oda yooloka.
‘OSHA KUKUTA’
“Ove tu pa okondalaka yepandja limwe i na ouyelele wepandja loye li na ouyelele woinima oyo ve ku totela koNasan.
Epandja loye olo ashike olo la li koVivo, ashike oukwatya wepandja inau lifa.
Paife ondi na okufuta tete,” omulandifi umwe ta ti.
Omulandifi okwa ti natango oku na omahooli omafiku ashona, ashike okwa tokola kutya ita mbeshitele omahooli amwe manga oinima aishe inai yelekwa nawa kuNasan.
“Ova pa nge omwaalu woshimaliwa shomahooli oo nda mbeshitela, ashike inandi futa. Ohatu shi efa manga fiyo twa kundafana kombinga yokondalaka.
Onduba yoitaashi ikwao oya lombwela nge kutya oya futa, ashike otaa pu po mexuliloshivike omu,” omulandifi ta ti.
Omunashipundi wehangano ledina Fuel and Franchise Association of Namibia (Fafa) Michael Ludeke oshivike sha dja ko okwa koleka koThe Namibian kutya okwa uda eelopota da faafana kovalandifi vomahooli ovo va kumwa koshinima eshi nokwa hala okupula epangelo kutya otali ningi po shike.
Ovalandifi vomahooli ova ti vali ekwatafano noNasan Energies ola kala la nghundipala neenghono.
‘EKWATAFANO LA NGHUNDIPALA’
Fafa oshivike sha dja ko okwa tumina omukanda koministeli yoikwafaabulika, oikwamina noikwanghono ta pula kuwedwe omafiku e li 60 opo oitaashi i lundululwe nawa, ta ti ekwatafano la nghundipala laNasan okwa li tali eta engwangwano.
Oitaashi yomahooli oya lombwela oThe Namibian kutya oya kala tai longo noudjuu okupopya noNasan noya pondola ashike okuninga oshoongalele komalungula nehangano Etitatu la dja ko.
“Mongeshefa omu, omu na okukala ekwatafano.
Kashi shi ngeno kutya ohandi kendabala okulandifa outyokolate, ohandi landifa omahooli.
Oshinima sha fimana neenghono, onghee nee ekwatafano oli na okukala liwa,” omulandifi umwe ta ti.
The post Nasan ota pula a futwe tete opo a yandje omahooli appeared first on The Namibian.
